Tax justice network uıymynyń málimetinshe, sońǵy 25 jylda Qazaqstannan  140–160 mlrd dollar shetelge zańsyz shyǵarylǵan. Keı sarapshylardyń boljaýynsha, aqsha kólemi budan da kóp.

Al jemqorlyqpen kúresti baqylaıtyn Transparency Kazakhstan qorynyń sarapshylary Qazaqstandaǵy "zańsyz shyǵarylǵan aktıvtedi qaıtarý" komısıasynyń jumysyna kúdikpen qaraıtynyn málimdedi.

Málimdeme avtorlary Qańtar oqıǵasynan keıin Toqaev jarlyǵymen qurylǵan "zańsyz shyǵarylǵan aktıvterdi qaıtarý" komısıasynyń qoǵamǵa esep bermeıtinine jáne jumys prosesin ashyq júrgizbegenine nazar aýdarǵan.

"Jer telimi sıaqty usaq múlikti qaıtarý –  jetistik  emes, áńgime jalpy ishki ónimmen salystyrýǵa keletin aktıvter jóninde bolýy kerek"– dedi olar.

Transparency Kazakhstan sarapshylarynyń pikirinshe, aktıvterdi qaıtarý týraly zań jobasy qupıa talqylana berse, olıgarhtar arasynda "tıisýge bolmaıtyn" adamdar tizimi jasalýy múmkin.

Sondaı–aq, sarapshylar bul Qazaqstannyń Jemqorlyq boıynsha reıtıńisin nasharlatyp jiberýi múmkin ekenin aıtty. Qazaqstan 2022 jylǵy reıtıń boıynsha jemqorlyq jaılaǵan elder qatarynda tur.

Eske sala keteıik, Qańtar oqıǵasynan Toqaev el baılyǵyn belgili bir toptar ıelenip alǵanyn birneshe ret aıtqan bolatyn. Al "Zańsyz shyǵarylǵan qarjyny qaıtarý jónindegi" arnaıy komısıa 2022 jyly alty aıda 631 mıllıard teńge qaıtarylǵanyn málimdegen.

"Elden zańsyz shyǵarylǵan aktıvterdi qaıtarý týraly" zań jobasy 31 naýryzǵa deıin parlamentke engizilýi kerek edi, alaıda áli kúnge deıin iske aspady.